பங்களாதேஷ் அணிக்கு எதிரான முதலாவது ஒருநாள் போட்டியில் இலங்கை அணியானது 77 ஓட்டங்கள் வித்தியாசத்தில் வெற்றி பெற்றது.
கொழும்பு ஆர். பிரேமதாச மைதானத்தில் நேற்று (02) நடைபெற்ற மூன்று போட்டிகள் கொண்ட தொடரின் முதல் ஒருநாள் போட்டியில், அணித் தலைவர் சரித் அசலங்கா 123 பந்துகளில் 106 ஓட்டங்கள் எடுத்தார்.
அசலங்காவின் சதத்தால், இலங்கை அணி 49.2 ஓவர்களில் மொத்தம் 244 ஓட்டங்களை எடுத்தது.
மேலும், சிறப்பான பந்து வீச்சினால் பங்களாதேஷை 35.5 ஓவர்களில் 167 ஓட்டங்களுக்கு சகல விக்கெட்டுக்களையும் இழக்கச் செய்து 245 என்ற இலக்கினை வெற்றிகரமாகப் பாதுகாத்தது.
வனிந்து ஹசரங்க 7.5 ஓவர்களில் 10 ஓட்டங்களுக்கு 4 விக்கெட்டுகளை வீழ்த்தினார்.
போட்டியில் நாணய சுழற்சியில் வெற்றி பெற்று முதலில் துடுப்பெடுத்தாடிய இலங்கை அணி, ஆரம்பத்தில் 29 ஓட்டங்களை எடுத்து 3 விக்கெட்டுகளை இழந்து தடுமாறியது.
அணித் தலைவர் சரித் அசலங்காவின் தீர்க்கமான சதம் இலங்கை அணியின் இன்னிங்ஸை ஓரளவுக்கு நல்ல நிலைக்கு கொண்டு சென்றது.
இடது கை வீரர் எச்சரிக்கையுடனும், நிதானமாகவும் தனது ஐந்தாவது ஒருநாள் சதத்தை பதிவு செய்தார்.
50 ஓவர்கள் நிறைவில் இலங்கையை 244 ஓட்டங்கள் என்ற நிலைக்கு அழைத்துச் சென்ற அசலங்க, நான்கு பந்துகள் மீதமிருந்த நிலையில் 123 பந்துகளில் 106 ஓட்டங்களை பெற்று ஆட்டமிழந்தார்.
245 ஓட்டங்கள் என்ற சாதாரண இலக்கை நோக்கி களமிறங்கிய சுற்றுலா அணி, ஒரு விக்கெட் இழப்புக்கு 100 ஓட்டங்களை எடுத்து, அதிரடியாக விளையாடியது போல் தோன்றியது.
ஆனால், 26 பந்துகளில் வெறும் 05 ஓட்டங்களுக்கு ஏழு விக்கெட்டுகளை இழந்து இறுதியில் 167 ஓட்டங்களுக்கு ஆட்டமிழந்தது.
இது ஒரு பேரழிவு தரும் திருப்பு முனையாக அமைந்தது.
தான்சித் ஹசனுடன் இணைந்து 71 ஓட்டங்களை எடுத்திருந்தபோது, நஜ்முல் ஹொசைன் சாண்டோ ரன் அவுட் முறையில் ஆட்டமிழந்தது தான் போட்டியில் திருப்புமுனையை ஏற்படுத்தியது.
சுழற்பந்து வீச்சாளர்களான வனிந்து ஹசரங்கா மற்றும் கமிந்து மெண்டிஸ் ஆகியோர் குழப்பத்தில் இருந்த பங்களாதேஷ் அணியின் நடுத்தர வீரர்களை அடுத்தடுத்து ஆட்டமிழக்கச் செய்து வெளியேற்றினர்.
இதனால், பங்களாதேஷ் அணி அழுத்தத்தின் கீழ் ஒரு பக்கம் தத்தளிக்க இரு சுழற்பந்து வீச்சாளர்களும் மொத்தமாக 07 விக்கெட்டுகளை பகிர்ந்து கொண்டனர்.
ஹசரங்க மைல்கல்
நேற்றைய ஆட்டத்தில் தனது 100 ஆவது ஒருநாள் விக்கெட்டை வீழ்த்தி தனிப்பட்ட மைல்கல்லை எட்டிய ஹசரங்கவுக்கு இது மறக்க முடியாத ஒரு இரவாக அமைந்தது.
இந்த சாதனையை எட்டுவதற்கு அவருக்கு 64 போட்டிகள் தேவைப்பட்டது.
அஜந்தா மெண்டிஸுக்கு அடுத்தபடியாக ஒருநாள் போட்டிகளில் வேகமாக 100 விக்கெட்டுகளை எடுத்த இரண்டாவது இலங்கை வீரர் என்ற பெருமையைப் 27 வயதான வலதுகை சுழற்பந்து வீச்சாளர் பெற்றார்.
மூன்று போட்டிகள் கொண்ட தொடரின் இரண்டாவது ஒருநாள் போட்டி சனிக்கிழமை அதே மைதானத்தில் நடைபெறும்.
