லண்டனில் பாலஸ்தீன ஆதரவு போராட்டம்: 18 பேர் கைது – மெட்ரோபாலிட்டன் காவற்துறைக்கு நடவடிக்கைக்கு எதிர்ப்பு!

லண்டன், மார்ச் 28, 2026 — லண்டனில் அமைந்துள்ள New Scotland Yard காவற்துறை தலைமையகத்தின் முன்பாக நடைபெற்ற பாலஸ்தீன ஆதரவு போராட்டத்தின் போது 18 பேரை Metropolitan Police கைது செய்துள்ளது. இந்த கைது நடவடிக்கை, முன்பு தற்காலிகமாக மாற்றப்பட்டிருந்த கொள்கையை மீண்டும் அமல்படுத்தியதன் பின்னணியில் இடம்பெற்றுள்ளது.

போராட்டத்தில் ஈடுபட்டவர்கள் “I support Palestine” என்று எழுதப்பட்ட பலகைகளைத் தாங்கி போலீஸ் தலைமையக படிகளில் அமைதியான முறையில் கூடினர். இந்நிலையில், காவற்துறையினர் தீவிரவாத எதிர்ப்பு சட்டங்களின் கீழ் இவர்களை கைது செய்துள்ளனர். சமீப காலங்களில் பாலஸ்தீன ஆதரவு ஆர்ப்பாட்டங்கள் அதிகரித்துள்ள நிலையில், இந்த நடவடிக்கை மேலும் பதற்றத்தை ஏற்படுத்தியுள்ளது.

கொள்கை மாற்றத்தின் பின்னணி

2026 பிப்ரவரி மாதத்தில், Palestine Action அமைப்பை தீவிரவாத அமைப்பாக வகைப்படுத்தியிருந்த இங்கிலாந்து அரசின் முடிவை உயர் நீதிமன்றம் சட்டவிரோதமாக அறிவித்தது. இதனைத் தொடர்ந்து, Metropolitan Police ஆரம்பத்தில் கைது நடவடிக்கைகளை நிறுத்தி ஆதாரங்களை சேகரிப்பதில் கவனம் செலுத்தியது. எனினும், மார்ச் 25 அன்று துணை உதவி கமிஷனர் ஜேம்ஸ் ஹார்மன் அறிவித்ததாவது, அரசின் மேல் முறையீடு நடைமுறையில் உள்ளதால் கைது நடவடிக்கைகள் மீண்டும் தொடங்கப்படும் எனத் தெரிவித்தார்.

எதிர்ப்புகள் மற்றும் குற்றச்சாட்டுகள்

Defend Our Juries உள்ளிட்ட பிரச்சார குழுக்கள், காவற்துறையின் இந்த மாற்றத்தை “U-turn” எனக் குற்றம் சாட்டியுள்ளன. மார்ச் 15 அன்று இதே போன்ற பலகையுடன் இருந்த ஒருவரை கைது செய்த சம்பவத்தையும் அவர்கள் எடுத்துக்காட்டினர். மேலும், கைது செய்யப்பட்ட ஒருபெண், “இஸ்ரேலுக்கு ஆயுதங்களை வழங்கும் அரசே, எங்களை கைது செய்கிறது” எனக் குறிப்பிட்டு அரசின் இரட்டை நிலைப்பாட்டை விமர்சித்துள்ளார்.

இந்த கைது நடவடிக்கை மனித உரிமைகள், கருத்து வெளிப்பாட்டு சுதந்திரம் மற்றும் அரசின் சட்ட நடைமுறைகள் குறித்த விவாதங்களை மேலும் தீவிரப்படுத்தியுள்ளது.