ஐரோப்பிய ஒன்றியம் அறிமுகப்படுத்தியுள்ள ஐரோப்பிய ஒன்றியம் அல்லாத நாட்டினருக்கான புதிய டிஜிட்டல் நுழைவு-வெளியேறும் முறை (EES) முழுமையாக நிறுத்திவைக்கப்பட வேண்டும் என விமானத் துறை நிர்வாகிகள் கோரிக்கை விடுத்துள்ளனர். இந்த திட்டம் தொடர்ந்தால் கோடை விடுமுறை காலத்தில் பயணிகள் நீண்ட நேர காத்திருப்பை சந்திக்க நேரிடும் என்று அவர்கள் எச்சரித்துள்ளனர்.
இந்த முறை அமலில் நீடித்தால் பயணிகள் நான்கு மணி நேரம் அல்லது அதற்கு மேல் காத்திருக்க வேண்டிய சூழல் உருவாகலாம் என விமானத் துறை தெரிவித்துள்ளது. தற்போதைய நிலையில் திட்டம் பகுதியளவில் செயல்படுத்தப்பட்டாலும் கூட இரண்டு மணி நேரம் வரை தாமதம் ஏற்படக்கூடும் என குறிப்பிடப்பட்டுள்ளது.
கடந்த ஆண்டு அக்டோபரில் அறிமுகப்படுத்தப்பட்ட இந்த டிஜிட்டல் நுழைவு திட்டத்தின் படி, பிரித்தானியாவைச் சேர்ந்த பயணிகள் உள்ளிட்ட ஷெங்கன் பிராந்தியத்திற்கு முதல் முறையாக பயணம் செய்பவர்கள் கைரேகை மற்றும் முக அடையாளம் போன்ற பயோமெட்ரிக் தகவல்களை வழங்க வேண்டும் என்பது கட்டாயமாக்கப்பட்டுள்ளது.
இதற்கிடையில், இந்த திட்டம் எல்லை பாதுகாப்பை மேம்படுத்துவதில் சிறப்பாக செயல்படுகிறது என்று ஐரோப்பிய ஒன்றியம் தெரிவித்துள்ளது. எனினும், விமான நிறுவனங்கள் பயணிகள் நீண்ட காத்திருப்பு நேரத்தால் சோர்வடையும் அபாயம் இருப்பதாகவும், இதனால் பயண அனுபவம் பாதிக்கப்படலாம் என்றும் கவலை வெளியிட்டுள்ளன.