தமிழ்நாட்டின் கரூரில் நடந்த கட்சி பேரணியின் போது 41 பேர் உயிரிழந்த 2025 செப்டம்பர் கரூர் கூட்ட நெரிசல் தொடர்பாக நடிகரும் தமிழக வெற்றிக் கழகத்தின் (TVK) தலைவருமான விஜய் இன்று டெல்லியில் மத்திய புலனாய்வுப் பிரிவு (CBI) முன் முன்னிலையாகவுள்ளார்.
விஜய் சென்னையிலிருந்து ஒரு தனி விமானத்தில் புறப்பட்டு டெல்லியை சென்றடைந்துள்ளார்.
இன்று காலை 11 மணியளவில் CBI தலைமையகத்தில் விசாரணைக்காக முன்னிலையாகுவார் என்று கூறப்படுகிறது.
கரூர் மாவட்டம் வேலுசுவாமிபுரத்தில் 2025 செப்டம்பர் 27 அன்று நடைபெற்ற TVK இன் அரசியல் பேரணியின் போது கூட்ட நெரிசல் ஏற்பட்டது.
விஜயை காண்பதற்கும், அவரது அரசியல் உரையினை கேட்பதற்கும் மணிக்கணக்காக அதிகளவிலானோர் ஒன்று திரண்டதனால் இந்த நிலை ஏற்பட்டது.
இந்த நெரிசலில் சிக்கி 41 பேர் உயிரிழந்தனர் மற்றும் பலர் காயமடைந்தனர்.
இந்த துயர சம்பவம் தொடர்பான விசாரணையின் ஒரு பகுதியாக, CBI முன்னதாக TVK உயர் அதிகாரிகளிடம் கேள்வி எழுப்பி அறிக்கைகளைப் பதிவு செய்துள்ளது.
இந்த நிலையில் நடிகர் விஜய்க்கு மேற்கண்ட அழைப்பாணை அனுப்பப்பட்டுள்ளது.
ஆரம்பத்தில், இந்த சம்பவம் குறித்து CBI விசாரணை நடத்துவதை தமிழக அரசு எதிர்த்தது, அதற்கு பதிலாக வழக்கை விசாரிக்க ஒரு சிறப்பு புலனாய்வு குழுவை அமைத்தது.
சட்டம் ஒழுங்கு மாநிலப் பிரச்சினை என்பதால், இந்த சம்பவத்தை விசாரிக்க ஒரு சிறப்பு புலனாய்வு குழு போதுமானது என்று அரசு நீதிமன்றத்தில் வாதிட்டது.
எனினும், கரூர் கூட்ட நெரிசல் “தேசிய மனசாட்சியை உலுக்கியதாக” குறிப்பிட்டு, சுயாதீனமான மற்றும் பாரபட்சமற்ற விசாரணைக்கு உத்தரவாதம் அளித்த உயர் நீதிமன்றம், விசாரணையை CBIக்கு மாற்றியது.
சிறப்பு விசாரணைக் குழுவைத் தொடர வேண்டும் என்ற அரசின் வேண்டுகோளை உயர் நீதிமன்றம் ஏற்க மறுத்து, மத்திய நிறுவனம் விசாரணையை மேற்கொள்ள அனுமதித்தது.
வழக்கினை பொறுப்பேற்றதிலிருந்து CBI, நிகழ்வுக்கு வழங்கப்பட்ட அனுமதிகள், கூட்ட மேலாண்மை நடவடிக்கைகள், காவல்துறையினர் பணியமர்த்தல் மற்றும் அவசரகால நடவடிக்கை ஆகியவற்றை ஆய்வு செய்து வருகிறது.
அதே நேரத்தில் டிவிகே நிர்வாகிகள் மற்றும் அதிகாரிகளிடமிருந்து வாக்குமூலங்களையும் பதிவு செய்து வருகிறது.
இந்த வழக்கில் விசாரணை ஆணையத்தின் முன்னதாக முன்னிலையானவர்களில் TVK மாநில பொதுச் செயலாளர் புஸ்ஸி ஆனந்த், இணைச் செயலாளர்கள் நிர்மல் குமார் மற்றும் ஆதவ் அர்ஜுன், கரூர் மேற்கு மாவட்ட செயலாளர் மதியழகன் ஆகியோர் அடங்குவர்.