வலி. வடக்கில் கொட்டும் மழையிலும் மண் மீட்பு போராட்டம்

35

வலி. வடக்கு பகுதியில் கடந்த 36 ஆண்டுகளாக இராணுவத்தின் உயர்பாதுகாப்பு வலயத்திலுள்ள தமது பூர்வீகக் காணிகளை விடுவிக்கக் கோரி, காணி உரிமையாளர்கள் இன்று (2026 மே 15, வெள்ளிக்கிழமை) 4-ஆவது வாரமாகப் போராட்டத்தை முன்னெடுத்தனர்.  யாழ்ப்பாணத்தில் இன்று நிலவும் கடும் மழை மற்றும் சீரற்ற காலநிலையையும் பொருட்படுத்தாது, பலாலி தெற்கு – தையிட்டி பகுதியில் அமைந்துள்ள இராணுவத்தினரின் “கொமோண்டோ” (Commando) பங்களாவிற்கு முன்பாக இப்போராட்டம் உணர்வுபூர்வமாக இடம்பெற்றது.

கடந்த 1990-ஆம் ஆண்டு ஜூன் மாதம் போர்ச் சூழல் காரணமாகத் தமது சொந்த இடங்களில் இருந்து வெளியேற்றப்பட்ட மக்கள், இன்று வரை அகதிகளாகவும் வாடகை வீடுகளிலும் வசித்து வருகின்றனர்.வலி. வடக்கின் 256 (தையிட்டி வடக்கு), 248 (காங்கேசன்துறை மேற்கு), 251 (தையிட்டி கிழக்கு) மற்றும் 255 (தையிட்டி தெற்கு) ஆகிய கிராம சேவையாளர் பிரிவுகளைச் சேர்ந்த மக்களே தமது நிலங்களை இழந்துள்ளனர். போர் முடிந்து 17 ஆண்டுகள் கடந்தும், சுமார் 651 ஏக்கர் நிலப்பரப்பு இன்னும் உயர்பாதுகாப்பு வலயமாகவே வைக்கப்பட்டுள்ளது.

 காணி உரிமையாளர்கள் கடந்த ஏப்ரல் 24-ஆம் திகதி முதல் ஒவ்வொரு வெள்ளிக்கிழமையும் இந்தப் போராட்டத்தை முன்னெடுத்து வருகின்றனர்: எமது நிலம் எமக்கு வேண்டும்”, “எமது வீடுகளில் நாம் வாழ விடு” போன்ற முழக்கங்களுடன் முதியவர்கள் மற்றும் பெண்கள் இதில் அதிகளவில் கலந்துகொண்டனர்.

அண்மையில் ஜனாதிபதியால் காணிகள் விடுவிக்கப்படும் என உறுதியளிக்கப்பட்ட போதிலும், நடைமுறையில் வலி. வடக்கில் எவ்வித முன்னேற்றமும் இல்லை என மக்கள் விசனம் தெரிவித்தனர். எதிர்வரும் மே 25-ஆம் திகதி பாதுகாப்பு அமைச்சின் அதிகாரிகள் வடபகுதிக்கு வரவுள்ள நிலையில், அதற்கு முன்னதாகத் தமது நிலங்கள் குறித்த தீர்க்கமான முடிவு எடுக்கப்பட வேண்டும் என மக்கள் வலியுறுத்தினர்.

மூன்று தசாப்தங்களுக்கும் மேலாகத் தமது சொந்த மண்ணில் கால்பதிக்க முடியாமல் தவிக்கும் வலி. வடக்கு மக்களின் வலி இன்று யாழ்ப்பாணத்தில் கொட்டிய மழையையும் விடக் கனமானதாக இருந்தது. தையிட்டி பகுதியில் அமைக்கப்பட்டுள்ள இராணுவ பங்களாக்கள் மற்றும் முகாம்கள் பொதுமக்களின் வாழ்விடங்களிலேயே அமைந்துள்ளன என்பதற்கு இந்தப் போராட்டம் ஒரு நேரடிச் சாட்சியாகும். “அரச காணிகளை விட எமது சொந்த உறுதிக்காணிகளையாவது முதலில் விடுவியுங்கள்” என்ற மக்களின் நியாயமான கோரிக்கை 2026-இலும் வீதியில் ஒலிப்பது வேதனையளிப்பதாகப் சமூக ஆர்வலர்கள் தெரிவிக்கின்றனர்.

#ValiNorthProtest  #LandRelease  #HighSecurityZone  #JaffnaNews  #RightToLand