10
ஐக்கிய அரபு அமீரகத்தின் கடற்கரைக்கு அப்பால் நங்கூரமிட்டிருந்த கப்பல் ஒன்று இனந்தெரியாத ஆயுததாரிகளால் கடத்தப்பட்டு ஈரான் கடற்பரப்பை நோக்கி கொண்டு செல்லப்படுவதாக பிரித்தானிய அதிகாரிகள் தெரிவித்துள்ளனர். ஐக்கிய அரபு அமீரகத்தின் புஜைரா (Fujairah) துறைமுகத்திற்கு வடகிழக்கே சுமார் 38 கடல் மைல் தொலைவில் இச்சம்பவம் இடம்பெற்றுள்ளது.
அங்கீகரிக்கப்படாத நபர்களால்’ (Unauthorized personnel) இக்கப்பல் கைப்பற்றப்பட்டதாக பிரித்தானிய இராணுவத்தால் இயக்கப்படும் கடல்சார் வணிக நடவடிக்கை மையம் (UKMTO) தெரிவித்துள்ளது. கடத்தப்பட்ட கப்பல் தற்போது ஈரானிய கடல் எல்லைக்குள் நுழையும் வகையில் பயணித்து வருவதாக உறுதிப்படுத்தப்பட்டுள்ளது. இந்தச் சம்பவம் சர்வதேச ரீதியில் பெரும் பரபரப்பை ஏற்படுத்தியுள்ளது:
இதேவேளை, ஓமன் கடற்பரப்பிற்கு அருகே இந்தியக் கொடியுடன் பயணித்த ‘ஹாஜி அலி’ (Haji Ali) என்ற சரக்குக் கப்பல் மீது தாக்குதல் நடத்தப்பட்டதில் அது தீப்பிடித்து மூழ்கியுள்ளது. அதிலிருந்த 14 இந்திய மாலுமிகளும் பத்திரமாக மீட்கப்பட்டுள்ளனர்.
இந்தச் சம்பவங்களுக்கு ஈரான் உடனடியாகப் பொறுப்பேற்கவில்லை என்றாலும், ஹோர்முஸ் நீரிணை தங்களுக்குச் சொந்தமானது என்றும், அங்கு அமெரிக்காவுடன் தொடர்புடைய கப்பல்களைக் கைப்பற்ற தங்களுக்கு உரிமை உண்டு என்றும் ஈரானிய அதிகாரிகள் மீண்டும் வலியுறுத்தியுள்ளனர். உலகின் எரிசக்தி விநியோகத்தில் ஐந்தில் ஒரு பங்கு (1/5) இந்த நீரிணை வழியாகவே நடைபெறுகிறது. இத்தகைய கடத்தல்கள் மற்றும் தாக்குதல்கள் உலக சந்தையில் எரிபொருள் விலையேற்றத்திற்கு வழிவகுக்கும் என அஞ்சப்படுகிறது.
ஹோர்முஸ் நீரிணையில் ஏற்பட்டுள்ள இந்த புதிய பதற்றம் சர்வதேச கப்பல் போக்குவரத்திற்கு பெரும் அச்சுறுத்தலாக மாறியுள்ளது. அமெரிக்கா மற்றும் ஈரான் இடையே ஏற்கனவே முறுகல் நிலை நீடித்து வரும் சூழலில், பிரித்தானிய அதிகாரிகள் உறுதிப்படுத்தியுள்ள இந்த கடத்தல் நடவடிக்கை நிலைமையை மேலும் சிக்கலாக்கியுள்ளது. குறிப்பாக, சீன அதிபர் ஷி ஜின்பிங் மற்றும் அமெரிக்க அதிபர் டொனால்ட் ட்ரம்ப் சந்திப்பு நடைபெற்று வரும் வேளையில் இச்சம்பவம் அரங்கேறியிருப்பது குறிப்பிடத்தக்கது. நீரிணைப்பகுதி சர்வதேச போக்குவரத்திற்கு திறந்திருக்க வேண்டும் என உலக நாடுகள் கோரிக்கை விடுத்து வருகின்றன.
#HormuzStrait #ShipSeized #IranTensions #UKOfficials #GlobalOilTrade