ஏறாவூரில்  அத்திவாரம் தோண்டிய போது துப்பாக்கி, வாள் மீட்பு!

29

கிழக்கு மாகாணத்தின் மட்டக்களப்பு, ஏறாவூர் காவற்துறைப் பிரிவுக்குட்பட்ட பகுதியில் வீடு கட்டுவதற்காக அத்திவாரம் தோண்டப்பட்ட போது, நிலத்தினடியில் இருந்து கைத்துப்பாக்கி மற்றும் வாள் என்பன நேற்று (2026 மே 20, புதன்கிழமை) கண்டெடுக்கப்பட்டுள்ளதாக ஏறாவூர் காவற்துறையினர் தெரிவித்துள்ளனர்.

காணி உரிமையாளர் வழங்கிய துரித தகவலின் அடிப்படையில் சம்பவ இடத்திற்கு விரைந்த காவற்துறையினர் இந்த ஆயுதங்களை மீட்டுள்ளனர். ஏறாவூர் காவற்துறைப் பிரிவிலுள்ள மிச்சிநகர், ரெட்பானா வீதியில் அமைந்துள்ள தனியார் காணி ஒன்றிலேயே இந்த ஆயுதங்கள் மீட்கப்பட்டுள்ளன. நேற்று பிற்பகல் 2:00 மணியளவில் காணியில் புதிய வீடு ஒன்றைக் கட்டுவதற்காக  அத்திவாரம் தோண்டும் பணியில் ஈடுபட்டிருந்த  தொழிலாளர்கள்  நிலத்திரைன ஆழமாகத் தோண்டிய போது, அங்குப் புதைத்து வைக்கப்பட்டிருந்த பழுதடைந்த கைத்துப்பாக்கி (Pistol) ஒன்றும், வாள் (Sword) ஒன்றும் கண்டெடுக்கப்பட்டன.

நிலத்தில் ஆயுதங்கள் இருப்பதை அவதானித்த காணி உரிமையாளர், இது குறித்து உடனடியாக ஏறாவூர் காவல் நிலையத்திற்குத் தகவல் வழங்கினார். சம்பவ இடத்திற்குச் சென்ற காவற்துறை அதிகாரிகள் ஆயுதங்களை மீட்டதோடு, அப்பகுதியில் மேலதிகமாக ஏதேனும் வெடிபொருட்கள் புதைக்கப்பட்டுள்ளனவா என்பது குறித்தும் சோதனைகளை நடத்தினர்.

மீட்கப்பட்ட கைத்துப்பாக்கி நீண்டகாலமாக நிலத்தினடியில் புதைக்கப்பட்டிருந்ததால் பழுதடைந்த நிலையில் காணப்படுகிறது. இவை கடந்த காலப் போர்க் காலத்தில் புதைக்கப்பட்டவையா அல்லது அண்மைக்காலமாக ஏதேனும் குற்றச் செயல்களுக்காகப் புதைக்கப்பட்டவையா என்ற கோணத்தில் ஏறாவூர் காவற்துறையினர் மேலதிக விசாரணைகளை முடுக்கிவிட்டுள்ளனர்.

கிழக்கு மாகாணத்தின் பல பகுதிகளில் கடந்த கால யுத்தச் சூழலின் போது புதைக்கப்பட்ட ஆயுதங்கள் மற்றும் வெடிபொருட்கள், தற்போதும் மக்கள் குடியிருப்பு நிலங்களைச் செப்பனிடும் போது அவ்வப்போது கண்டெடுக்கப்படுவது வழக்கமான ஒன்றாகவே இருந்து வருகிறது. ஏறாவூர் மிச்சிநகர் பகுதியில் மீட்கப்பட்டுள்ள இந்த ஆயுதங்கள் எந்தக் காலப்பகுதிக்குரியவை என்பதை உறுதிப்படுத்தக் காவற்துறையினர் இதனை நீதிமன்ற அனுமதியுடன் தடையியல் விபரப் பகுப்பாய்விற்கு (Forensic Analysis) அனுப்ப நடவடிக்கை எடுத்துள்ளனர். காணி உரிமையாளர் பதற்றமடையாமல் உடனடியாக அதிகாரிகளுக்குத் தகவல் வழங்கியமை பாராட்டுக்குரியதாகும்.

#EravurNews  #WeaponsRecovered  #BatticaloaDistrict  #PoliceInvestigation  #SriLankaSecurity